Tulihlah hal nan paliang elok nan pernah dibaco!
Paliharolah hal nan paliang elok dari nan pernah ditulih!
Kiro-kiro bantuak itu ungkapan nan pernah ambo danga dari guru sangkek baraja dulu.
Mambaco indak sajo hal nan tatulih. Tapi kito dituntut juo mambaco nan indak tatulih. Dalam ungkapan al-Qur'an, ayat nan partamo turun mamarintah kito untuak mambaco. Tapi, perintah mambaco indak manyabuik apo objek nan dibaco. Manuruik ulama tafsir, ayat ko manyuruah kito untuak mambaco apo sajo, baik al-ayah al-qur'aniyyah (ayat al-qur'an) maupun al-ayah al-kauniyyah (alam semesta). Urang Minang alah biaso mambaco alam, "alam takambang jadi guru".
Kadang, ingatan kito indak setia. Apo nan pernah kito baco, indak salamonyo tingga di pangana. Mako, salah satu caronyo disaratoan jo manulih apo nan tabaco. Untuak itulah blog ko ado.
Dun sanak kasadonyo! ketek indak basabuik namo, gadang indak baimbau gala. Alhamdulillah, blog "Serba Minang" ko bisa singgah ka ruang dun sanak. Tujuan utamo blog ko hanya untuak babagi informasi jo dunsanak sadonyo tentang sagalo nan bahubungan jo Minang. Hanyo sajo, informasi nan kami sampaikan alun lai langkok. Yo, namonyo sajo sekedar untuak babagi.
Harapan kami, dunsanak kasadonyo namuah maagiah kritik jo saran nan mambangun. Akhirnyo, kok ado salah jo jangga kami mohon ditunjuak-ajari dek dunsanak kasadonyo. Semoga blog ko bamanfaat untuak kito basamo.
Wassalamu 'Alaikum Wr. Wb.
Posting Komentar